Babette - X-Meisie

Sy's jonk, sy's cool, sy’s SA se nuwe Rock sensasie...en sy’s HOT!
Die naam Babette is deesdae op almal se lippe… hou hierdie donkerkop maar gerus dop, want sy gaan die musiekbedryf nog met haar kookwater-rockklanke, cool lirieke en treffende stem verower!

Babette se debuutalbum, X-Meisie, is vars op die platerak en gaan beslis opgeraap word deur almal wat van rock en up-tempo klanke hou.
Die album spog met twaalf kraakvars Afrikaanse en Engelse liedjies en die lirieke en musiek komplementeer Babette se unieke styl.
"Ek sing van alledaagse situasies waarmee mense kan identifiseer," gesels sy oor haar debuutalbum.

Die titelliedjie, "X-Meisie" was ‘n treffer op MK en haar tweede single “Misverstaan” was ‘n geruime tyd op die MK top10. Haar derde video “dis okay” is binnekort te sien.

Erns Grundling het in die huisgenoot van 15 Mei 2008 gesê: “Nee kyk, dit sit nie in enigiemand se broek – of rok! – om die woorde ‘so laat jou meisie verstaan / jy kom nie huis toe vanaand nie / sy weet dit nog nie / maar sy’s nou jou eksmeisie’ met soveel gesag en rou sensualiteit te sing nie. Snotkop en die vervaardiger Mark Kahn het die talentvolle Babette onder hul vlerk geneem. Sy rock ook met die liedjie Party vanaand voor sy ‘n mens om haar pinkie draai met die hartseer ballade Misverstaan. Sy sing met die energie van rocksterre soos Pink en Avril Lavigne.”

Babette het in Centurion grootgeword en na skool het sy drama aan die Tshwane University of Technology studeer. Tydens haar studentejare het sy in dramaproduksies soos "Veronica Decides To Die", "Still Waiting" en "Pols" haar merk gemaak.

Sy het van kleins af 'n passie vir musiek gehad en haar inskrywing aan die Africa Vision liedjieskryfkompetisie het haar 'n tweede plek besorg. Sy het haar sangtalent geslyp toe sy sanglesse by Ina Wiegand en Chris Coetzer geneem het.
Sy is ook tans besig om 'n graad in BA Kommunikasiekunde deur Unisa te studeer.

"Ek hou omtrent van alle genres musiek, behalwe rave," vertel Babette.
Plaaslik luister sy graag na Karen Zoid en Fokofpolisiekar.
Babette vertel dat sy graag haar eie unieke stempel op die plaaslike musiekbedryf wil afdruk.

Sit maar stewig op jou stoel wanneer jy Babette se klanke aanskakel of na een van haar shows gaan luister, want die girl gaan jou behoorlik laat rock!

Die album is landwyd beskikbaar.

Vir enige navrae skakel Louis du Plessis – 011 704 1530 of Zinta van der Merwe - 072 434 9454